اية الوقت المناسب لخروج الكتكوت من الفقاسة

بوست لاهل التفريخ
اية الوقت المناسب لخروج الكتكوت من الفقاسة
طبعا كلنا عارفين ان الكتكوت لما بيفضل مدة اكبر من مدتة فى الفقاسة بيحصلة جفاف وبيتعب المربى جدا فى المزرعة
دا طبعا علشان فقد جزء من سوائل جسمة
الكتكوت اللى يفقد سوائل فى جسمة مش هيعرف يجيب افضل اداء للسلالة
طيب تعالى نستعرض شوية تجارب ومواقف حقلية تبين اكثر مدى اهمية الموضوع دا
مدة التفريخ 21 يوم يعنى 504 ساعة
طبعا ممكن المدة دة تزيد شوية او تقل على حسب امور كتير
منها ما هو متعلق بالفقاسة او ما هو متعلق بالتربية وحالة الام والبيضة نفسها
لاكن لو الامور ماشية كلها تمام فدى افضل ساعات ممكن يتعرض ليها الجنين لظروف التفريخ علشان ميفقدش سوائل من جسمة وبالتالى
هيكون تحويلة لا يرضى المربى
وعلشان فية ظروف متعلقة بزيادة او نقصان عدد الساعات دى فخليها قانون كدا فى التفريخ
هو
افضل وقت يخرج فية الكتكوت من الفقاسة لما يكون من 5 الى 8% من الكتاكيت رقبتها مندية او مرطبة طبعا النسبة
دى ممكن توصل ل 10% لو التراى او صنية البيض قريبة من حوض التبريد او حوض المية
بكدا مهما اختف ظروف الفقاسة وظروف الام فلا تتقيد بعدد الساعات ( 504 ساعة) بل تقيد بمقايس النسبة اللى ذكرناها
طيب تعالى نتكلم على ارض الوقع يعنى
** احد الدفعات لم يتقيد بالشرط السابق ولظروف معينة قعد البيض فى الفقاسة 525 ساعة
كانت النتيجة انخفاض متوسط الدفعة دى عن زملائها بمقدار 140 جرام وطلع منها 11.5% سردة او تفاوت فى الاحجام
** تجربة اخرى لسلالة كوب قعدت 492 ساعة مع اخرى لها نفس الظروف قعدت 522 ساعة
كانت النتيجة تفوق الاولى ب 120 جرام عند عمر شهر عن التانية
واخر الدورة كل عنبر 10000 طير خرج منة سردة من ال492 ساعة 290 طير
اما 522 ساعة فخرج منها سردة 870 طير كانت اوزانهم اقل من الوزن التسويقى المطلوب
طبعا كل ما كان وزن الكتكوت اعلى واتعرض لظروف ساعات اكثر فى الفقاسة كان الفقد فى سوائل جسمة اكبر
وبالتالى سردة اعلى فى المزرعة ووزن اقل
يعنى الذكور بيكون فقدها فى الماء اعلى من الاناث
وكل ما كبرت الام فى العمر (يعنى بيض اكبر حجم وكتكوت اكبر وزن)) كل ما الفقد دا زاد
خلاصة القول
علشان اصحاب معامل التفريخ يوصلو للمربى منتج جيد
لازم التقيد بالقانون اللى ذكرناة فوق
5الى 8% من الكتاكيت زغب الرقبة مرطب
علشان تتاكد اكثر ان دا افضل وقت يطلع فية الكتكوت هتلاقى
الساق براقة مش دبلانة وجافة مش رطبة ووردية اللون
اما لو معرفتش تخرج الكتكوت عند النقطة اللى قلنا عليها فهتلاقى الكتكوت طبعا ناشف من منطقة الرقبة
وهتلاقى قصبة الساق مسطحة وجلدها لونة داكن مقرب على السواد فتعرف ان الكتكوت دا هيتعب المربى جدا
اللهم اجعل عملنا هذا خالص لوجهك الكريم
مع تحياتى وشكرا