فنيات تربية الدواجن: المناعة الناقصة وكيفية علاجها في تربية الدواجن

جملة مشهورة دايما
المناعة ناقصة فنيات تربية الدواجن: المناعة الناقصة وكيفية علاجها في تربية الدواجن
دى حاجات بتقلل #المناعة
تثبيط مناعى
الجمل دى معناها اية
علشان نفهم يعنى اية مناعة
تعالى نتكلم على الجهاز المناعى
المشكلة ان الموضوع متشعب وصعب لمة فى بوست واحد
فانا هكتب ولما ازهق اكمل فى بوست اخر بكرة بامر المولى دا لو الناس عاوزة النوعية دى من البوستات
===========
الجهاز المناعى بيعمل كذا حاجة فى الجسم
بس اهم وظيفة هى حماية الجسم من اى غزو خارجى سواء الغزو دا ( بكتيريا -فيرس-فطر - او اى جسم غريب يدخل
وبنسمى الغزو دا انتجين Antigen
يقوم الجهاز المناعى باعلان الحرب على الغزو دا ويقضى علية ودا بنسيمة الاستجابة المناعية دا طبعا لو الجسم سليم وقادر على كدا
طيب هل كل غزو خارجى نطلق علية انتجين
مختصى المناعة قالو لا
مش كلة
فقط اللى بيعملى اثارة للجهاز المناعى
يعنى اللى الجهاز المناعى بيعلن علية الحرب
طيب الجهاز المناعى بيعرفة ازاى؟؟
خلى بالك من المعلومة دى لانها هتتكرر كتير واحنا بنتكلم فى التحصينات المتقدمة
الجسم بيتعرف على الغزو دا او بيتعرف على الانتجين دا عن طريق البصمة
يا راجل حتى دى فيها بصمة؟؟
ايوة اسمها البصمة الانتيجينية لها اسم علمى تانى اسمة ابيتوب epitope
يعنى زى ما كل واحد فينا لة بصمة فكل غزو او انتجين مهما كان المسبب بكتريا او فيرس او فطر لة بصمة الجسم بيتعرف علية منها
البصمة دى عبارة عن بروتين موجودة على سطح الغزو او النتىجين دا
بيكون عبارة عن ندبة او صابع او بروز على جسم الانتجين
طيب هل ممكن يكون نفس الغزو او النتجين اكثر من بصمة او اكثر من ابيتوب
هقولك ايوة
ودا اللى بيسموة انتجينات متعددة البصمة
وهنا بيكون مشكلة لان الجسم بيتعرف على بصمة واحدة ولما الفيرس او البكتريا يكون لة اكثر من بصمة فهنا الجسم محتاج طريقة اخرى للتعرف علية علشان كدا
التحصينات لو لم تشمل كل البصمات بتاعة المرض فمش هتصد كل انواع المرض زى ما بيحصل مع ال IB
طيب
نتكلم عن الجهاز المناعى بطريقة مفصلة اكثر
هو عبارة عن جيش او قوات مسلحة فيها عساكر واسلحه وقيادة
يعنى خلايا مناعية واعضاء لمفاوية اولية وثانوية ومركبات كيمائية وكل حاجة من دول لة وظيفة محددة فى اطار منظومة دقيقة جدا
يعنى تعالى نشوف
الخلايا المناعية
دى تعتبر الجنود اللى بتتعامل مع الغزو او المسبب المرضى او الانتجين
وبيعتبر خلايا كرات الدم البيضا المكون الاساسى لها
نقول نبذة سريعة عن كل نوع من الخلايا دى
اولا الخلايا الالتهامية او الماكروفاج
دى تعتبر اكبرخلايا كرات الدم البيضا دى بتعرف تخترق اى شعيرات دموية علشان توصل للعضو المصاب او المهدد من المرض دا لان لها ارجل كاذبة بتتحرك عن طريقها
وبمجرد ما تتحرك الخلايا دى من الدم الى العضو او الانسجة بنسميها الخلايا البلعومية او الالتهامية لانها اول خلايا بتقابل الضيف اللى داخل الجسم
شوف بتلتهم الغزو ازاى
بتلف ارجلها حول الفريسة وتعمل حوصلة حوليها وبعدين تفرز انزيمات تعمل هضم للميكروب دا وتعمل فصل البصمة بتاعتة عن جسمة وتقعد تفرز البصمات دى عن طريق خلايا اخرى اسمها خلايا T المساعدة
هل كدا بس
لا
بتفرز مركبات كيميائية زى النتريك اسيد او فوق اكسيد الهيدروجين اللى بتقتل المرض او الميكروب فى الحال
طيب هل كدا دورها انتهى ؟
لا
هى بتصحى باقى الجهاز المناعى علشان يعمل حسابة لاى عزو ميكروبى
فالجسم بينتج النترفيرون والانترلوكن
ثانيا خلايا B
دى بيكون مصدرها البيرسا
دى فيها كلام كتير جدا بس خلينا نشوف هى بتشتغل ازاى
او ما تشوف الانتجين او الغزو
بتعملة ابتلاع وهضم وابراز للبصمة بتاعتة
بينتج عن العملية دى اية
ان خلايا B بتتقسم الى نوعين من الخلايا
الاولى شكل الانتجين اللى اصاب الجسم بالظبط لان عارف البصمة ودا بيفيد ان اول ما يحصل اصابة تانية بنفس المرض فالجسم يصدة من الخلايا دى بنسميها خلايا الزاكرة اللى بتحفظ بصمة اى مسبب مرضى دخل الجسم
والثانية خلايا البلازما العادية اللى بتفرز الاجسام المناعية لنفس المرض وبتطلع الخلايا المناعية دى فى الدم والمخاط وسوائل الجسم المختلفة
ثالثا خلايا T
ودى مصدرها الغدة الثيموسية الموجودة فى الرقبة
دى فريدة من نوعها لانها مش بتعرف تتعامل مع المرض او الانتجين كلة لا
بتتعامل مع بصمتة فقط
فبمجرد ما تعرف بصمة المرض من الخلايا B اللى جاية من البيرسا
بتنتج خلايا مساعدة اسمها خلايا تى المساعدة
اللى بتعمل زى المايسترو اللى بيقود كل الجهاز المناعى وما بة من خلايا مناعية ضد المرض دا عن طريق بصمتة
ملحوظة هامة
البصمة دى عبارة عن احماض امينية مش كربوهيدات او دهون علشان كدا بيسموها الانتجينات البروتينية ودى اللى بتنشط خلايا T المساعدة اما لو الانتجين غير بروتينى فدا موضوع تانى
رابعا واخيرا
خلايا T السامة
هى ايضا تنشظ او تنتج من الثيموس لكنها تختلف عن T المساعدة فى انها
بمجرد ما تعرف بصمة الانتجين او المرض
تفرز سموم تقتل الخلايا المصابة بالانتجين اللى فيها
بكدا خلصنا الخلايا المناعية اللى بتتعامل مع اى مرض يدخل الجسم
نيجى للجزء التانى
الاعضاء اللمفاوية
مش عاوزين نشرح كتير
لان البوست طول جدا والناس هتزهق
لكن خلينا نقول ان الاعضاء اللمفاوية منها اولية وثانوية
الاولية زى #البيرسا
والثيموس
وتقريبا كلكم عارفينهم
والثانوية
زى
الطحال - العقد المفاوية المنتشرة فى الجسم خاصة فى الامعاء - غدة هارديريان الموجودة فى العين - لوزتى الاعورين - جيوب باير - انثناء ميركل
وتقريبا كل دول خصصنالهم بوستات سابقة مفصلة واية الامراض اللى بتصيبهم
البوست الجاى لو لقينا قبول هنقول انواع المناعة
لكن قبل ما نختم
اية ممكن يرفع المناعة
لو انت من هواة الشغل الكيماوى
فيتامين هـ و#السلينيوم وفيتامين سى والزنك والليفاميزول
كل واحد فيهم محتاج بوست لوحدة لاكن الخلاصة خلطهم مع بعض بيرفع المناعة
لو بتحب الاعشاب
ف#الزعتر او #حبة البركة بيرفعو المناعة
طيب هل فية ادوية بترفع المناعة
اقولك ايوة
البرنس (#اللينكومايسين ) بيرفع المناعة ودا هنحاول نخصص لة بوست لوحدة
طبعا فية روافع مناعة جدد ومختصين هنقولهم علشان لما حد يعرض عليك دوا وتلاقيهم مكتوبين تعرف انهم للمناعة
زى المناناوليجوسكاريد
ليبوبولى سكاريد
وفية شغل جديد من جدار الخميرة بس دا قصة كبيرة صعب نقولها الوقتى لان فيها كلام معقد
انا اسف جدا جدا على الاطالة لكن فى مثل هذة الموضوعات صعب الاختصار
ولو زهقتو بلاش نكمل بوست المناعة القادم
اللهم اجعل عملنا هذا خالص لوجهك الكريم
مع تحياتى وشكرا
مهندس عاطف عبد الدايم