فوائد الخل للدواجن - طريقة وكمية الخل اللازمة لدورة التسمين

فوائد الخل للدواجن
اتكلمنا قبل كدا عن الخل فى اكثر من تركيبة 
( تركيبة البصل والثوم والليمون والخل )
واتكلنا فى بوست سابق عن تحميض المية ودورها فى التسمين
طيب تعالى نجمع هنا فوايد الخل كارخص حمض ودورة فى دواجن التسمين 
حتى البياض والامهات بيفيد بس دا عاوز بوست مخصوص
المهم
هنقول فوايد الخل ونقول كلام علمى يوضح الكلام دا
اهم فايدة للخل هو استعمالة فى الجو الحار وازاى بيلطف حرارة القناة الهضمية اللى هى لو اتطلفت حرارتها هتشيل عبئ حرارى عن الجسم وتخفف الموجة الحارة
= من اهم فوايدة خفض الph بتاع الجهاز الهضمى
طيب ودا هيفيد فى اية؟
هيفيد ان جميع العمليات الهضمية اللى بسببها بيحضل هضم وتحويل ورفع اوزان الافضل لها تتم فى وسط حمضى
زى الانزيمات الهضمية بتشتغل وبتزيد كفائتها فى الوسط الحمضى بالتالى بيزيد الوزن حتى فى الحر اللى هو اصلا صعب زيادة الوزن فية
= رفع حموضة القناة الهضمية عن طريق اى حمض وخاصة الخل بيقلل جدا من العد الميكروبى الضار اللى هو مسبب اساسى لخفض الوزن ( لانة بيعمل اسهال )
فبتزيد معاة الميكروبات النافعة على حساب الضارة بالتالى زيادة فى الهضم والامتصاص وزيادة فى افراز الانزيمات والاحماض الهاضمة
= عملية اللهاث بتاعة الحر بترفع من قلوية الجهاز الهضمى ودا اللى بيخلى استهلاك العلف اقل والشهية ضعيفة
لاكن لو خفضنا الحموضة باستعمال الخل فالجسم بيرجع لطبيعتة خاصة الشهية واستهلاك العلف
تعالى ناخد كلام علمى 
( لان بيعاب علينا ان كل كلامنا حقلى والناس مش عارفة تستفيد منة )
السبب فى ان الخل بيقلل العد الميكروبى الضار
ان اثناء انخفاض الحموضة بيتحرر بروتونات الحمض وبيخترق جدار الخلايا الميكروبية الضارة دا اولا
ثانيا
غالبية الميكروبات بتحب الوسط القلوى لان الخل بيعكس الموضوع فبتموت بسبب الحموضة
لاكن تعالى لفكرة التحميض الطبيعى نفسة
يعنى ان الجسم لو حمض نفسة الفايدة بتكون اعلى 
طيب ازاى الجسم يحمض نفسة؟؟؟
بيقولك فية ميكروبات لاهوائية فى القناة الهضمية دى بكتيريا نافعة 
زى ( كولستريديا نافعة - لاكتوباسيلس - بيفيدوباكتيريم )
على فكرة دى متعايشة فى الاعورين 
ودا احد اسباب ان الاعورين ممكن ينتفخو من غير امراض
طيب انت عارف دول بيعملو اية فى الجسم
البكتيريا النافعة دى بتاخد الكربوهيدرات وخاصة السكريات وبتعملها تخمر تطلع احماض هامة للجسم زى حمض اللاكتيك - البيوتريك اسيد - جمض البروبيونيك 
ودا اللى بيخلى الجسم يهضم ويقاوم الامراض المعوية
طيب دا بيحصل طبيعى فى الجسم طالما الامعاء سليمة ( مفيش كوكسيديا او كولستريديا او سالمونييلا او كولاى )
طيب عاوز ترفع حموضة القناة الهضمية وتساعدة ان هو اللى يرفعها 
ضيف سكر فى العلف
السكر دا بيساعد البكتريا النافعة دى انها تشتغل اكثر وتفرز مزيد من الاحماض النافعة
علشان كدا يقولك ارخص فكرتين للتسمين 
هى السكر فى العلف
والخل فى المية 
وعلشان دا ميكونش عبئ على الدورة ممكن اختار اخر اسبوعين من الدورة واشتغل على الفكرة دى 
لاكن بكل اسف لو الامعاء مصابة باى مرض فالفكرة دى مش هتجيب نتيجة
كمية اضافة الخل هى 7 مل على اللتر من خل البيت
او نص الى 1 جرام من الخل المركز
كمية اضافة السكر 
5 كيلو على الطن