خبراء دواجن:هل للفرشة ورعايتها تاثير على المناعة

هل للفرشة ورعايتها تاثير على المناعة
؟؟؟؟؟؟؟؟؟؟؟؟
معلومة غريبة الكتير هيتعجب ليها
وهى ان الفرشة ممكن تكون السبب فى رفع مناعة الكتكوت فى فترة التحضين
ودى متجربة فى اكثر من شركة
ازاى بقى؟؟؟؟؟؟؟؟؟؟؟؟
هقولك ان فية علاقة بين الفرشة وسرعة امتصاص كيس المح اللى هو المصدر الاساسى للمناعة عن الكتكوت فى الفترة الاولى
ولاجل ذالك
بيقولك لابد من الاتى
استعمال فرشة عميقة لا تقل باى حال من الاحوال عن 5 الى 7 سم
لابد ان تكتسب الفرشة دى حرارة من 25 الى 29 درجة يعنى لازم تشغل الدفايات قبل استقبال الكتاكيت بفترة كويسة علشان الفرشة تكتسب الحرارة دى دا احد الاسباب
السبب الاخر
استواء الفرشة وعدم وجود منحنيات فيها علشان نتجنب ما يسمى بالجيب الحرارى thermo pocket ومعروف ان وجود الجيب دا لة دور فى تاخير امتصاص كيس المح
الثلاث توصيات اللى فاتت
فرشة عميقة
حرارة الفرشة
الجيب الحرارى فى الفرشة
بتسرع من امتصاص كيس المح فى اقصر فترة ودا بيرفع المناعة لاحتواءة على الاجسام المضادة القادمة من الام
اللهم اجعل عملنا هذا خالص لوجهك الكريم
مع تحياتى وشكرا

بعض الفنيات عن رطوبة الفرشة
استكمال لسلسة الرعاية الجيدة
البوست اللى فات قلنا الحرارة والبوست دا الرطوبة
احنا اتكلمنا قبل كدا عن الرطوبة ومصدرها وكيفية علاجها فى بوستات سابقة
المرة دى هندردش على الرطوبة من ناحية تانية
الكل عارف خطورة رفع الرطوبة وازاى بتعمل امراض وامونيا وتتسبب فى فشل كتير من الدورات
من المعروف ان الطير بيشرب تقريبا ضعف او اكثر قليلا او اقل قليلا من ما بياكل
يعنى مثلا عنبر يستهلك 2طن علف فى اليوم فمن المؤكد انة استهلك قرابة 4 الى 5 طن مية او م مترمكعب
طيب خلايا جسمة بتستفيد فقط من ثلث الكمية دى من الماء
الباقى هيخرج اما مع الزرق اللى هو 40 الى 60% منة رطوبة
وجزء من الماء دا هيروح للزفير او التنفس على هيئة بخار ماء
(عاوز تعرف كمية بخار الماء اللى انت مستهون بيها اقفل العنبر ليلة كاملة من غير اى تهوية وشوف كمية البخار المتعلقة فى السقف واللى وقعت على الفرشة فى الصباح )
معنى كدا ان العنبر يعتبر مليان مية سواء بخار او رطوبة زرق ودا هيبان على رطوبة الفرشة وانها هتعجن
لاكن فى الحالة دى بمجرد ما نشغل مرواح الشفط بيستبدل الهواء المحمل بالرطوبة دا بهواء جاف دافئ من الخارج ويالتالى بيخف حمل الرطوبة فى جو العنبر وبتخف رطوبة الفرشة
علشان تخفف رطوبة الفرشة او رطوبة العنبر دى محتاجة تخلى بالك من الحرارة
بمعنى ان فى الحرارة العالية سهل ان الهواء يحمل الرطوبة بكمية اكثر وعلى العكس فى الحرارة المنخفضة فالرطوبة اللى الهواء بيشيلها اقل
ودا اللى بنسمية الرطوبة النسبية
وفية قانون ان كل 15 الى 20 درجة زيادة فى الجو قادرة انها تخلى الهواء يشيل ضعف المية
يعنى مثلا حرارة 20 لو الهواء هيشيل 100 لتر مية
ف فى حرارة 35 واعلى ممكن نفس كمية الهواء تشيل 200 لتر مية من جو العنبر
وطالما الهواء شال او اتحمل بالرطوبة دى
هتيجى المروحة تخلصنا من كمية الهواء الرطب اللى داخل العنبر دا
لاكن فى الجو البارد هنعمل اية
؟؟؟؟؟؟؟؟؟؟؟؟؟؟؟؟؟؟
كل ما فى الموضوع انك هتخلى الجو او هوا العنبر يشيل اكبر كمية من الرطوبة زى ما وضحنا
يعنى هترفع حرارة العنبر الى اقصى حرارة مقبولة ومناسبة مع العمر
رفع الحرارة مع تشغيل المراوح بيقلل من الرطوبة فى الجو وفى الفرشة
طيب الرطوبة المثلى لعمل افضل تربية اية؟؟؟؟؟؟؟؟
هى 55 الى 65%
طبعا لو الرطوبة اقل من كدا فهنا مفيش مشكلة فى رطوبة الفرشة
اما مثلا لو الرطوبة زادت الى 75%مثلا وكانت الحرارة قليلة او دورة شتا
هنا الفرشة هتجلد وهيحصل امونيا وامراض معروفة
فى الحالة دى لازم تتعامل مع الفرشة اول باول ومتستناش لما تجلد يعنى شيل الرطوبة اول باول لان الانتظار فى الحالة دى بيزيد المشكلة جدا لدرجة التعقيد او انك تشيل النشارة كلها وتستبدلها بفرشة جديدة
طيب الحل الافضل اية
وطبعا تشغل المرواح فترة اطول هيساعد
لاكن فعلا التصرف الافضل ان حرارة 26 مثلا فى الشتا ورطوبة عالية 75%بمجرد ما ترفع درجة الحرارة بس 3 درجات فى العنبر توصل ل29 او حتى 30 مش هتضر فى التربية لاكنها هتخليلك الرطوبة الى 58% يعنى الطبيعى اللى لا يجلد الفرشة ولا يجيب اسهالات بنية او كوكسيديا
لان الهوا هيكون اعلى فى حمل الرطوبة من جو العنبر ومن الفرشة
من الاستعراض اللى فات دا نفهم ان جودة الهوا اهم من كمية الهواء اللى داخلة للعنبر
وبردة نفهم ازاى نتعامل مع الرطوبة فى حالة البرودة او الحرارة العالية
وخليك فاكر ان التربية الصحيحة يعنى تهوية - رطوبة
فاعرف طبيعة المنطقة اللى انت شغال فيها علشان تعرف تتصرف
اللهم اجعل عملنا هذا خالص لوجهك الكريم
مع تحياتى وشكرا