كيف اعرف سموم العلف واحسب تاثيراتها

كثير من الاخوة المربين وايضا المشرفين
بيسألو
لو ارسلت عينة علف علشان احللها
اعرف ازاى ان السموم وخاصة الافلاتوكسين فى حدود المسموح
والبوست دا هيخدمك فى سؤالك ويضيف بعد النسب المسموحة لبعض المواد السامة اللى بتعمل موت مفاجئ ويظن المشرف انة سموم فطرية
المهم
الحد المسموح من الافلاتوكسين 20 جزء فى البليون ppb
ولو عاوزة بالملجرام لكل كيلو علف هو 0.02 ملجم / كيلو علف
طيب وانا بحلل علف
هل فية تسممات اخرى غير السموم الفطرية ممكن تعمل نافق او تعمل اعراض السموم
اقولك ايوة
احنا هنقولك كم النسبة المسموحة من كل مادة ضارة
اما تاثيرها على الطير دا محتاجة 3 بوستات ولا اعتقد ان حد محتاج الاعراض دى
المهم
الزرنيخ 2مجم /كيلو علف
الفلورين 30 مجم
الرصاص 5 مجم
الزئبق اذا وجتة باى نسبة مهما كانت صغيرة ارمى العلف فورا
النتريت 15مجم
للناس اللى عاوزة تبدل الصويا بكسب بذرة القطن معاك الى 20مجم جوسيبول امان
(دى المادة السامة اللى فى كسب القطن )
بكدا يكون معاك دليلك فى اى وقت عاوز تحلل علف احفظ النسب دى
طيب هل نقفل البوست على كدا
ولا بلاش بخل ونضيف حاجة تانية
هقولك انا كمهندس عاطف على طريقة تسمى التغذية العلاجية الخاصة بالسموم
بمعنى
لو عندى سموم فى العلف
بنسبة اعلى من المسموح شوية
والنسبة دى هتقلل من الوزن عندى وهتاثر على اعضاء الجسم
(( ودا عنوان البوست القادم بامر الله لو فية تفاعل مع البوست دا))
طيب انا ممكن اعمل اية فى تركيبة العلف واقلل من اضرار السموم الفطرية
اقلل مش امنع
يعنى اللى هعملة دا بالاضافة الى العلاج بمضادات السموم المعروفة سواء على العلف او المية
نقول بامر الله الوزن مش هيتاثر معاك
اولا السموم وخاصة الافلاتوكسين بيقلل من هضم او ميتابوليزم البروتين
فلو ضيفت 2%بروتين اثناء الاصابة بالسموم فبكدا هتعادل التاثير الضار للسموم
فلو علفك 22% خلية 24 % ولو 21 خلية 23% طوال فترة السموم
وفية تجارب كتير على ان
لما اترفع البروتين اثناء الاصابة بالافلاتوكسين او الاوكراتوكسين لم يظهر نافق السموم المعروف
ايضا لو انت بتركب علفك وتحط ميثيونين ولايسين زود من الاول نص كيلو ومن التانى ثلث كيلو
دا ايضا بيقلل من التاثير الضار للسموم على نمو الطير خاصة فى فترة الكتاكيت يعنى العمر الصغير
لو عندك اصابة بالاوكراتوكسين خاصة
عندك حمض امينى مشهور جدا بيتحدى الاوكراتوكسين دا وبيكرهة
وهو الفينيل الانين
يعنى وانت بتزود بروتين العلف والمثيوين والايسين
ضيف اى منتج فية ميثيل الانين فى المية
هتلاقى خطر السموم على النمو لم يظهر
طيب من المعروف ان الافلاتوكسين بتضرب الكبد
والكبد دا هو المسؤل عن هضم وتمثيل الدهون
يعنى اثناء الاصابة تقريبا من 30 الى 50% من دهون العلف غير مستفاد منها
ايضا لازم تزود الطاقة شوية
وانا حسبتها علشان نعوض الطاقة فقط ضيف 11 كيلو زيت صويا للطن
طيب السموم بتعمل عرج صح؟؟
والعرج دا سببة ان السم بيمنع تحول فيتامين د2 الى د3 طبعا الطير مش بيستفيد الا من د3
وعلشان نمنع تاثير السموم والعرج لازم اضافة د3
عاوز تضيفة على العلف افضل
عاوز تضيفة على المية مش مشكلة
معروف ان نسبتة على العلف 3 وحدة دولية علشان الطير مش يعرج منك ارفعة الى 8 وحدة دولية
باقى فقط اكسدة الخلايا اللى بيعملة السم
ودا مش محتاج اكثر من فيتامين هـ وسيلينيوم علشان يقاوم الاكسدة دى
بالسرد اللى فات دا نقدر نبين اننا نعرف نقاوم ما يفعلة السموم الفطرية عن طريق رفع قيمة العلف نفسة وبكدا مخفش على اوزانك
اسف جدا للاطالة بس مش حبيت اجى بايدى فاضية
تفاعلك فى البوست يدل على اهتمامك بالنوعية دى من البوستات
لو فية تفاعل هنكتب بوست عن كل سم بيعمل اية فى الاعضاء بالتفصيل وعلشان لا ننخدع فى التشخيص
اللهم اجعل عملنا هذا خالص لوجهك الكريم
مع تحياتى وشكرا