فنيات تربية الدواجن:المناعة المكتسبة ودورها في نجاح دورة الفراخ

فنيات تربية الدواجن:المناعة المكتسبة ودورها في نجاح دورة الفراخ
فى البوست الاول اتكلمنا عن الجهاز المناعى
والثانى عن #المناعة الخلقية
هنا هنتكلم عن المناعة المكتسبة وهى النوع التانى من المناعة
وهى اللى دايما بنشتغل غليها سواء بالتحصينات او الامراض اللى بتدخل الجسم
المناعة المكتسبة دى اللى الجسم بيكتسبها اما نتيجة انتىجين دخل الجسم او تحصين
دايما نسمع عن ان التحصين الميت بيعمل مناعة دموية او لها اسم تانى مصلية
وان التحصين الحى بيعمل مناعة خلوية
اهو المناعة المكتسبة دى بتكون من مناعة مصلية ومناعة خلوية
نركز فى البوست دا لانة معقد شوية
وهحاول ابسطة بقدر المستطاع
ناخد النوع الاول
---------------
المناعة المصلية
من اسمها كدا نعرف انها مناعة منتشرة فى سوايل الجسم حتى قالولنا فى الكلية اسمها Humoral immunity
,;وكلمة هيومر humor دى بالاتينى سوائل
(( دكاترتنا كان بيعزو الاتينى اكثر من اولادهم ))
المهم معنى كدا ان دى مناعة منتشرة فى سوائل الجسم (( دم - دموع - مخاط - لعاب ... الخ ))
يعنى المناعة دى المسؤولة عن التخلص من المسبب المرضى او الانتجين اللى بين خلايا الجسم
ميزة المناعة دى انها شديدة التخصص للانتيجين لدرجة ان الاجسام المناعية متخصصة لبصمة انتيجينية معينة اللى قلنا عليها فى البوست اللى فات ابيتوب epitope اللى موجود على جدار الانتجين
اهم مسؤل عن الخلايا الدموية دى خلايا B اللى مصدرها البيرسا
ودا بيفسر لة مش بنخلط اى تحصينة مع الجمبورو فى الا بطريقة مدروسة وان اى تحصينة مع الجمبورو بيكون الغلبة لتتر الجمبورو
بيساعد خلايا B فى المناعة الدموية خلايا T والخلايا الالتهامية وخلايا Tالمساعدة
(( ارجع للبوست اللى فات علشان تتذكر كل نوع من الخلايا دى ))
بس المساعدة دى لها شروط
او بتتوقف على طبيعة الانتجين نفسة
يعنى فية انتجينات بروتينية والنوع دا من الانتجينات بتظهر بصمتة كل من خلايا B والخلايا الالتهامية علشان تتعرف علية خلايا T المساعدة
الانتجين دا اسمة انتيجين معتمد على خلايا T
المناعة من النوع دا بتتميز ان لها ذاكرة
وخير مثال للكلام دا ان لما الجسم يتعرض لاى مرض او تحصينة بيكون مناعة ضدها فبيقاوم اذا جاء المرض تنى بيقاوم ازاى؟
من خلايا الذاكرة اللى كونها للمرض دا من خلال المناعة اللى قلناها دى
وفية انتيجينات غير بروتينية ودى مش بتظهر على سطح الخلايا بل كل اعتمادها على خلايا B فبتفضل مرتبطة بمستقبلاتها فبينشطها مناعيا انها تفرز اجسام مضادة ضد الانتجين دى
ما يميز النوع دا ان ملوش ذاكرة مناعية
يعنى لو فية اصابة للجسم من مرض معين ممكن يصيب الجسم تانى عادى لان ملوش ذاكرة او مناعة الجسم مش فاكراة
فية مثل صغير لموضوع انتيجينات بروتينية لها ذاكرة وانتيجينات غير بروتيينية مش لها ذاكرة دى
* الفيرس وبكتيريا موجبة الجرام زى الكولستريديا لهم غلاف خارجى بروتينى
اما البكتيريا السالبة ( سالمونييلا - كولاى ) فلها غلاف من الدهون يعنى غير بروتينى
علشان كدا المناعة مختلفة
نرجع لموضوع المناعة الدموية او المصلية
هى عبارة عن اجسام مناعية مضادة مفرزة فى الدم وسوائل الجسم الاخرى وهذة الاجسام هى عبارة عن بروتين من النوع جاما
فية منها 3 صور
املينوجلوبيولين جى IgG
اميونوجلوبيولين ام Ig M
اميونوجلوبيولين أ IgA
يعنى لما تسمع اى بروتين اوجسم مناعى من الثلاثة دول تعرف ان دى مناعة دموية
طبعا لكل جسم مناعى من دول تركيب بس دا كلام معقد ومش هيفيد فى حاجة
لكن لو عاوزينة ممكن اكتبة فى بوست لوحدة
لكن ممكن نتعرف سريعا على الفرق بين كل نوع منهم
=====
املينوجلوبيولين جى IgG
دا اكثرهم انتشارا فى الدم نسبتة تقريبا 80% من جملة الاجسام المناعية ولانة منتشر جدا فى صفار البيض
فممكن تلاقى ناس مسمياة اميونوجلوبيولين واى )IgY (yolk
تقريبا كل بيطة فيها 100 ملجرام من الجلوبيولين جى
--------
اميونوجلوبيولين ام Ig M
دى موجود منة صورتين
الصورة الاولى مستقبل للاتجين على خلايا B والنوع التانى مش متذكرة =D
ما يميز النوع دا انة اول حاجة بتتفرز لما يثار الجسم مناعيا
يعنى اول ما بيحصل اثارة مناعية سواء من مرض او من تحصين على طول الجلوبيولين دا بيفرز علشان كدا بيسمو الموضوع دا الاستجابة الاولية
دى تركيبتة غريبة شوية بس من غرابتها انها ممكن تلتحم مع 10 انتجينات فى نفس الوقت زى ما بيحصل مع التحامة بالفيروسات
------
اميونوجلوبيولين أ IgA
الجسم المناعى دا بيمثل من 10 الى 15% من جملة الاجسام المناعية فى السيرم
لكنة بيمثل غالبية الاجسام المناعية المنتشرة فى اللعاب والدموع ومخاط الجهاز التنفسى والهضمى
ودا اكثر خلايا مناعية بتفرز يوميا
==============
النوع التانى من المناعة المكتسبة
المناعة الخلوية
دى اللى بتتكون من حقن التحصين الميت
لية اسمها مناعة خلوية
لان الخلايا المناعية اللى بتقوم بالمهمة دى بتهاجم الخلايا المصابة وجة لوجة
طبعا الخلايا المصابة دى محتوبة على المرض نفسة سواء فيرس او بكتيريا
النوع دا من المناعة هو اللى بيخلص الجسم من الانتجين اللى اخترق الخلية وعمل اصابة دا
بيعتر من اقوى انواع المناعة المكتسبة
بتقوم بية اساسا خلايا T السامة الخلايا دى بتتعامل بشراسة مع الاصابة
يعنى بتفرز مادة سامة قاتلة داخل الخلية المصابة فبتموت الفيرس وبتموت الخلية المصابة نفسها وبعد ما تخلص الخلية دى وما فيها من مرض تتجة لخلية اخرى امصابة وكهذا
رهيبة بصراحة
بيقولو ان ممكن يشترك فى النوع دا من المناعة خلايا Tالمساعدة بجانب خلايا T السامة
انا اسف جدا للاطالة وانا اختصرت كلام كتير علشان الناس لا تمل
كمان حاولت تبسيط الموضوع على قدر المستطاع
وكنت عاوز اقولك ازاى بيحصل استجابة مناعية للتحصينات او استجابة مناعية مصلية لقيت البوست هيطول جدا
فنخلية فى البوست القادم بامر المولى
وياريت نشوف الناس المهتمة بالمناعة من خلال التعليقات
ودا اللى هيشجعنا ننزل بوست الاستجابة المناعية
اللهم اجعل عملنا هذا خالص لوجة الكريم
مع تحياتى وشكرا
مهندس عاطف عبد الدايم