فيرس التقزم او الريو AVIAN REOVIRUS فيروس التقزم في الفراخ البيضاء بالصور

كل ما تريد معرفته عن فيرس التقزم او الريوAVIAN REOVIRUS

فيروس التقزم في الدواجن فيروس التقزم في الفراخ البيضاء بالصور 

فيرس لنا معة مواقف كتيرة جدا حقليا 
فيرس بيعمل اكثر من مشكلة 
صاحب القطيع اللى ابتلاة ربة بفيرس الريو فى عمر مبكر يعتبر مهدد فى العملية التسمينية نفسها يعنى نسبة من القطيع مش هتدخل فى حيز الوزن
فيرس تلاقى العنبر المصاب بية دايما فرشة مرطبة ومبتلة وبها جميع انواع الوان الزرق ودى شفتها حقليا كتير وفية صورة تحت بكدا
بيعمل نمو ريش غير منتظم وبيخلى الريشة عمودية على الجسم شكل الطيارة الهليكوبتر فبيسموة مرض الهليكوبتر وفية صورة تحت بالشكل دا
المرض اسمة ايضا مرض العظم الهش 
لان الفيرس لما بيضرب القناة الهضمية بيعمل خلل عالى فى هضم الكالسيوم والفوسقور وفيتامين د
كتاكيت المصابة ب الريو دايما متجمعة تحت الدفايات اسسهالاها برتقالى واوقات كتير زى المية 
طيب تعالى نبحر شوية فى الفيرس دا نتعرف علية اكثر 
ولو لقينا تفاعل واقبال من الناس 
هنكتب مواقف المهندس عاطف الحقلية معاة
فية منة انواع كتير زى #الريو المفصلى ودا بيصيب المفصل وبيعمل #عرج viral
arthritis/tenosynovitis 
النوع دا بيعمل تورمات فى كلام المفصلين بتوع الرجل المفصل اللى فوق واللى تحت اللى اسمهم 
hock#
(tibiotarsal-#tarsometatarsal) #joints#
دا فى اول المرض ولما يشتد شوية بيعمل تاكل ثم تمزق فى الوتر العضروفى الموجود فى المفاصل يعنى صعب الطير يكمل تسمين 
عاوز تعرف هل تورم المفصل دا نتيجة ريو فيرس ودا مرض اخر 
هتلاقى بعد مرحلة تمزرق الاوتار المفصلية دى لون جلد المفصل اتغير الى اللون الاخضر 
وانا هحطلك صورة ل اللون الاخضر دا تحت
وهحطلك صورة اخرى لتمزق الاوتار تشريحيا
ومش الفراخ بس اللى بيجيلها ريو فيرس كمان مميز جدا فى الطيور الاخرى وخاصة فى البط المسكوفى ف تلاقى فى تشريح البط نقط متنكرزة على كل من الكبد والطحال والكلية فى نفس الوقت 
اول ما تلاقى ال3 مع بعض اعرف ان دورة البط المسكوفى دى مش هتجيب وزن
مميز جدا فى مرض الريو دا اللون البرتقالى فى الزرق واسوء حاجة ان المربى ينخدع فية ويعتقد انها كوكسيديا او كولستريا 
لان نسبة اصابة الفيرس فى القطيع تقريبا 10%فقط فى العمر الاول ولما تنخدع فى لون الزرق وتعالج كوكسيديا وكولستريا بترهق باقى ال90% من القطيع على الفاضى
طيب اية الفيرس دا 
؟؟؟
دا يا سيدى تبع جنس Orthoreovirus, وعيلة Reoviridae
حجمة 60 الى 80 نانومتر
#فيروس غير مغلف محتوى على شريطين من الحمض النووى RNA
محتوى على 10 فصائل من البروتين 3 كبير 3 وسط 4 صغير جوة الفيرس نفسة او الجينوم بروتين الS1 اللى هو تبع الصغير هو المسؤول عن تكاثر الفيرس داخل خلية الطير
وفية صورة تحت توضح كدا
فية منة نوع بيصيب الثدييات لكن بتاع #الدواجن مختلف عنة انة مش بيعمل تراص لكرات الدم الحمرا
فيرس مقاوم للحرارة يعنى معاك حتى 56 درجة ولمدة ساعة وبردة مش هيموت وبردة مقاوم لكتير من المطهرات يعنى الفورمالين واليود مش بياثرو علية
حتى الPH من 3 الى 9 يعنى حمضى او قلوى مش بيهمة
طبعا الفيرس بيتنقل راسى من الام
ودا اخطر حاجة
يعنى الامهات لو مش متحصنة تحصينتين ومختارين بحرفية وتوقيت جيد ف سهل جدا ينتج كتاكيت فيها ريو
موضوع كيفية العدوى الرئسية داطويل وفية كلام مناعى وفيسلولجى كثير صعب نقولة فى البوست دا
العلماء بيقولو ان الفيرس بيضرب البيرسا بالتالى يعتبر مثبط للمناعة
طبعا هو بيضرب جدار القناة الهضمية وخاصة منطقة الخملات بالتالى ضرب عملية الهضم فى مقتل وخاصة ان لة اسم اخر malabsorption#,
بيقولك الطيور اللى عندها سؤء هضم بسبب الفيروس بيكون مخزن #الجليكوجين متبهدل بالتالى بتتاثر عملية تحويل الجليكوجين الى جلوكوز وبالتبعية بيتاثر #جلوكوز #الدم 
ايضا الفيرس بيوقف هضم الدهون والهضم بصفة عامة لانة بيضرب القنوات البنكرياسية اللى بتوصل العصارة الى الاثنى عشر
علشان كدا صعب الطير #يسمن
الفيروس بيعمل 
مية وغازات فى الاعورين والقناة الهضمية وانا حاطط لكم صورة تحت تبين العرض دا
كمان بيضرب البيرسا بالتالى فهو مثبط مناعى 
بيقولك ان بعد الاصابة ب 12 ساعة تلاقى الفيرس انتشر فى الجسم كلة عن طريق الدورة الدموية واول ما بيدخل بيكون على القناة الهضمية ثم الكبد والطحال
بعدين يروح على المفاصل يعمل العرج اللى قولنا علية
علشان كدا العلماء بيقولو ان ممكن النوعين يكونو موجودين فى نفس الطير يعنى عدم هضم العلف وبردة التهاب مفاصل
اللى بيسهل على الفيرس الحركة انة بيصيب الماكروفاج كمان فيخليها تفرز النتريك اسيد استجابة لT cell cytokines
بيقولك صعب يجى فى الدورة مرتين بسبب قدرة الجهاز المناعى على التعرف علية فى المرة الاولى علشان كدا لو اتحصنت الامهات صح صعب يجى فى التسمين
كمان لان التحصينة اللى من عترة S I 133 بتعمل حمايةمن غالبية العترات الحقلية 
عاوز تعرف لية لما الفيرس بيدخل الجسم بيخرب الهضم او المفصل او المناعة
بيقولك فية بروتين على سطح الفيرس اسمة protein sigma1
دا المسؤول عن الالتطاق بالمستقبل اللى على سطح خلية الطير اللى اسمة سياليك اسيد
فبيعمل خلل خلوى عالى او (cytopathic effect (CPE
بينتج عنة اولا تدوير للخلية ثم انكماش ثم تلف فى النواة وفى الاخر يعمل موت مبرمج للخلية او ما يسمى cellular apoptosis
لما تيجى تقرا على مناعات الريو فيرس تعرف فعلا ان لو الام متحصنة كويس صعب يجى فى التسمين
لان الام بتتحصن فبتنقل الاجسام المضادة للكتكوت عن طريق البيض فبيعمل مناعة سلبية تتيح لنقل الامينونوجلوبيولين ج (immunoglobulin G (IgG خلال البيضة اللى بيروح اغشية الصفار ثم يذهب الى الدورة الدموية للكتكوت
غالبية الاوساط العلمية العالميةبتقول لو برنامج امهات فية تحصينة واحدة حى
وتحصينتين ميت فى الامهات بتعمل اقصى مناعة وصعب ينتج عنها كتاكيت عندها ريو ولا حتى بنسبة بسيطة
لان المناعة الامية قادرة على جماية الكتاكيت منة فى اهم فترة حساسية ممكن يجى فيها المرض وهى اول اسبوعين
خلى بالك المرض مش بيعمل نافق ملحوظ يعنى بيكون عندك افراد متقزمة او معرجة طول الدورة بدون نافق عالى مثل باقى الفيروسات
للجماعة محترفى الامهات
لوعاوز تطلع كتاكيت كويسة من ناحية الفيرس اعمل برنامجك تحصينك كما قولنا سابقا بحيث لما تقيس مناعة الريو لا تقل عن 8300 اليزا
ولو عاوز تعرف انواع العترات الموجودة ف عندك التحصينات الحية عترة 2177 وعترة S1133
دول يحموك من النوع المفصلى ودول ليهم تحصين حى
اما الميت ففية نوعين واحد مفصلى زى عترة 1733 ونوع بيحميك من سؤء الهضم ووتحصينة مين بردة اسمة عترة 2408
الامريكان والاوربين بيقولو ان فية نوع من الريو بيعمل اعراض عصبية زى لف رقبة وارتعاشات فى الجسم كلة
مصدر المعلومات العلمية رسالة دكتوراة من جامعة ولاية نورث كارولينا الامريكية ترجمها لكم مهندس عاطف عبد الدايم
مع بعض المواقف الحقلية للمهندس عاطف
على وعد بامر الله بكلام حقلى اكثر مع نفس المرض اذا احيانا الله 
لكن لى مواقف معاة كتير 
وهنحاول نطعم المواقف الحقلية بتفسيرات علمية 
اسف جدا انى طولت على حضراتكم
اللهم اجعل عملنا هذا خالص لوجهك الكريم
مع تحياتى وشكرا
مهندس عاطف عبد الدايم