فنيات تربية الدواجن :‏معادلات الخاصة بالدواجن

فى مجال الدواجن بعض التباينات يعنى اللى يصلح معاك فى مزرعتك ممكن لا ينحج مع غيرك
لكن فى حالة كتابة معادلات داجنية
فهنا مفيش اختلاف بين مزرعة واخرى
دا قانون على الجميع
طبعا اللى متابعنا من الاول عارف اننا كتبنا معادلات لمعرفة استهلاك المية اليومى
ومعادلة تعرف بيها بتاكل كم شيكارة علف فى اليوم
ومعادلة تعرف وزنك اخر الدورة
غير معادلات التهوية والمرواح وخلايا التبريد والحد الادنى من التهوية
يعنى المهندس عاطف مدلعكم اخر دلع =D =D =D
لعل الدلع دا يخفف مصائب الفيروسات
ندخل فى المهم
تعالى نستعرض بعض المعادلات اللى ممكن مش ذات اهمية بالمقارنة بالمعادلات السابقة
لكن هنكتبها من باب ان الجروب يكون متنوع وشامل
اول معادلة
حساب كمية الادوية على لتر مية بالملجرام
المختصين بيحسبو الدوا بالملجرام لكل كيلو وزن حى صح؟
طيب هل تعرف تحسب بالملجرام لكل لتر ؟؟
هقولك خد المعادلة دى
كمية الدواء بالمجم لكل لتر ماء = ( كم مجم لكل كيلو * متوسط وزن الطيربالكيلو ) / متوسط استهلاك المية باللتر
يعنى مثلا
جرعة الاموكسى لما تقرا على العلية 20 مجم لكل كيلو
وانت عاوز تعالج بية على عمر مثلا 16 يوم لما وزن الطير 500 جرام
والطير هيشرب فى العمر دا 180 سم
يعنى جرعة الاموكسى هتكون = ( 20 * 0.5 )/ 0.18
= 55 ملجم لكل لتر مية
شوف انت تركيز الدوا اللى على العلبة واحسبها
علشان اسهل عليكو هذكركم بمعادلة استهلاك المية
كمية المية المستهلكة فى اليوم = العدد بالاف *العمر باليوم * 5.6 * 2 فى الصيف
المعادلة التانية
ودى اسمها معامل الكفاءة
بتستعملة اوربا والشركات الكبيرة فى تقييم الدورة وعلشان يعرفو شغل مهندس او دكتور المشروع
معامل الكفاءة = ( نسبة عدد ما تبقى من الطيور فى اخر الدورة * متوسط وزنهم ) /(معامل التحويل * العمر التسويقى )
وتضرب اللى يطلع فى 100
يعنى مثلا
عنبر 10 لالف مات 8% باقى منة 9200 طير يعنى نسبة المتبقى 92%
متوسط الوزن 1.9 ك
معامل التحويل 1.75
تم البيع على 35 يوم
هيكون معامل الكفاءة = (92 * 1.9 )/(1.75 *35) = 280يعنى دورة جيدة
وبيقولك
اقل من 200 يعنى دورة فاشلة
من 200 الى 250 متوسطة
من 250 الى 300 جيدة
اعلى من 300 ممتازة
المعادلة الثالثة
علشان نحسب حاجة اسمها مسافة عزل المزرعة او العنبر
يعنى ريحة الامونيا واتربة العنبر ممكن تتحرك مسافة كم حول العنبر
ودى بتفيد فى لو بتعمل مزرعة لازم تبعد غرف العمال او المكتب كم متر
ولو مزرعتك وسط الناس المفروض تبعد كم علشان مفيش حد يشم ريحة الامونيا او يوصلة غبار المزرعة
طبعا فى حالة سكون الرياح
مسافة العزل = 27 فى عدد الطيور فى المزرعة اس 0.54
يعنى
عنبر 5 لالف = 27 * (5) 0.54 = 64 متر
دا محيط انتشار الريحة والغبار بتاع عنبرك ال5 لالف
المعادلة الرابعة
الناس اللى بتحب تعمل مكمل غذائى نباتى من السبلة
او ما يسمى الكوموست عاوز يعرف العنبر دا هيعملة كم متر كومبوست
خد المعادلة دى
كمية الكومبوست بالمتر مكعب اللى هطلع من العنبر تساوى
عدد الطيور فى العنبر اخر الدورة * متوسط الوزن * 0.003
يعنى عنبر 10 الاف طير متوسط الوزن اخر الدورة للفرخة 2 كيلو
هيطلع 10000 * 2 * 0.003
= 6 متر مكعب كومبوست
المعادلة الاخيرة
ودى خدها كدا لما نكتب بيها بوست تفصيلى
معدل البيرسا الى وزن الجسم
واللى بنعرف منها كفاءة تحصينة الجمبورو
المعدل = وزن البيرسا *1000 / وزن الجسم بالجرام
وعلى السريع كدا
لو طلع الرقم اعلى من 4 فالتحصينة بتاعتك كفاتها 100%
وبامر الله هنجهز بوست مفصل بالارقام عن
معدل البيرسا دا لان الارقام فية كتير
اتمنى يكون البوست عجب الناس
عاوزين تفاعل يليق بالبوست علشان نكتب اى شى فية معادلات
اللهم اجعل عملنا هذا خالص لوجهك الكريم
مع تحياتى وشكرا