الفرق بين الكتكوت فقس يومه وكتكوت مر عليه يوم بالمعمل وكيف تعرف الفرق بالصور

حذرنا كتير من عدم قبول دفعة كتاكيت مر عليها فترة فى معمل التفريخ او بمعنى اخر بايتة

الفرق بين الكتكوت فقس يومه وكتكوت مر عليه يوم بالمعمل وكيف تعرف الفرق بالصور

واتكلمنا فى بوستات سابقة عن الفرق بين الكتكوت البايت والكتكوت الطازة او اللى بيروح المزرعة بمجرد ما يفقس
اتكلمنا عن الفرق بينهم من حيث المناعة الامية ومن حيث امتصاص كيس المح ومن حيث تقبل الادوية
طيب لان الارقام بتوضح الكلام بشكل اكبر
تعالى نقول لحضرتك اذا وافقت على استقبال كتكوت بايت اية اللى هيحصل كوزن فقط
فية قانون بيقول
"" الكتاكيت اللى بتفضل فى الهاتش بحرارتة العالية (99 الى 102 ف )
كل 24 ساعة بتفقد من جسمها بسبب البخر واللهاث 5 جم عبارة عن رطوبة جسم""
بناء علية
لو كتكوت وزنة 42 جرام هيخرج بايت من المعمل بوزن 37 جرام
طيب عن طريق معادلات الوزن اللى كنا كتبناها قبل كدا تعالى نشوف الفرق بين الكتكوتين اخر كل اسبوع
الكتكوت الطبيعى وزنة 42
اخر الاسبوع الاول هيكون 42 * 4.4 = 184 جرام
فى حين ان الكتكوت البايت 37 * 4.4 = 162 جرام
(معادلة الاسبوع الاول بتكون حاصل ضرب الوزن عمر يوم فى 4.2 للشغل العادى او 4.6 للشغل الاحترافى فاحنا هنخليها كمتوسط 4.4 ))
راجع المعادلات اللى نزلناها قبل كدا على الجروب
اخر الاسبوع التانى هيكون وزن الطبيعى 184 (وزن اليوم السابع )*2.55 =470 جرام
البايت 162 *2.55 =413 جرام
اخر الاسبوع الثالث الطبيعى هيكون
470(وزن الاسبوع الثانى ) * 1.95 = 916 جرام
البايت 413 *1.95 = 805 جرام
اخر الاسبوع الرابع او على عمر شهر
هيكون الكتكوت الطبيعى 916 (وزنة فى الاسبوع الثالث ) *1.6= 1465 جرام
البايت هيكون 805 * 1.6 = 1288 جرام
دا عمر ووزن التسويق فى السعودية
لو كلمنا كمان اسبوع زى مصر
هيكون وزن الطبيعى اخر الدورة (35 يوم )
1465 جرام *1.5 =2.200 تقريبا
البايت 1288 * 1.5 = 1932 جرام
على فكرة الاتنين واكلين نفس العلف

دا على افتراض انك محافظ على الامراض طول الدورة
عارف الفرق فى الوزن كم
268 جرام لكل طير
يعنى لو عندك مزرعة 10 الف طير طافى 9400 علشان نافق 6%
عارف خسرت كم لحم باستقبالك كتكوت بات
خسرت 2519 كيلو يعنى 2.5 طن
عارف خسرت كم فلوس
لو السعر مثلا 16 جنية 40 الف جنية خسارة
ولو مزرعة 5 الاف 20 الف جنية
فقط فرق وزن
هل انت مجبور تخسر الخسارة دى ؟؟
دا مش هقولك على الفرق متاعيا بين الكتكوتين لان البايت بيعذبك ادوية ونافق اعلى وامور اخرى كتير اتكلمنا عنها قبل كدا
بس على افتراض ان فقط الفرق فى الوزن

انا جايبلك صورة لريش الجناح تعرف منها الكتكوت المتاخر فى الفقس او البايت والطازة

اللهم اجعل عملنا هذا خالص لوجهك الكريم
مع تحياتى وشكرا