فنيات تربية الدواجن: المناعة الخلقية ودورها في وقاية الدواجن ونجاح دورة التسمين

ثانى بوست عن المناعة فنيات تربية الدواجن: #المناعة_الخلقية ودورها في وقاية الدواجن ونجاح دورة التسمين
البوست الاول اتكلمنا عن الخلايا والاعضاء المناعية وحاولت بقدر المستطاع ابسط الموضوع لانة كلامة معقد شوية حتى ايام ما كنت بدرسة ومع انى بعشق قسم دواجن الا انى اجى عن محاضرات المناعة ونفضل متنحين
لكن بعد التخرج عرفت انها هامة جدا
تعالى هنا نتكلم عن
انواع المناعة
هم نوعين بس
نوع طبيعى ربنا خالقة اسمة المناعة الخلقية
ونوع اخر الجسم اللى بيكونة اسمة المناعة المكتسبة
تعالى نشوف النوع بتاع ربنا
المناعة الخلقية
خلى بالك المناعة الخلقية دى عبارة عن جدران او حوائط او حواجز كل اللى بتعملة انها بتصد المرض اللى داخل او الانتجين
ومعنى انها جدران او حواجز يعنى هى من اعضاء الجسم
ومعنى انها من اعضاء الجسم ومش خلايا متخصصة يعنى بتتعامل مع الامراض كلها مع بعض او مع الانتجينات كلها ( احنا مش هنقول المرض او الميكروب بعد كدا هنقول انتجين علشان كلامنا يكون ادق))
طيب معنى كدا اية؟
معناة ان المربى ممكن يقوى الجواحز او الجدران دى علشان يقوى النوع دا من المناعة
طيب اية الحواجز دى؟؟
هم ثلاثة حواجز
اولا الحاجز التشريحى
ودا اول مدافع عن الجسم
والحاجز دا عبارة عن 4 اعضاء
=== الجلد
ربنا اعطى للجلد اسلحة كتير علشان يدافع عن الجسم
وفى الدواجن هتلاقية خلاياها سميكة قوية جدا عليها ميكروبات نافعة ((فلورا يعنى)) وكمان ربنا واهبة غدد دهنية بتفرز دهون فبتقلل حموضة الجلد
تخيل كل الاسلحة دى فى الجلد فقط علشان تمنع اختراق اى ميكروب للجسم
لكن طبعا بمجرد ما يحصل اى قطع او خدش فى الجلد تلاقى دخل ميكروبات زى الاستاف فى فى الارجل او دخل النوع الجلدى من الكولستريديا
لكن لو انت محافظ على الجلد هتلاقية بيحمى نفسة
==== الاهداب
او السيليا
دى اللى بتبطن الجهاز التنفسى من فوق خاصة القصبة الهوائية
بصراحة السليا دى بالذات محتاجة محاضرات وكتب لان فيها كلام فنى وحقلى كتير جدا
لكن خلينا نختصر
ربنا واحب الاهداب دى بطريقة دفاعية جميلة جدا
هى عبارة عن اسواط او اهداب بتتحرك بصورة سريعة جدا بمعدل 350 الى 500 مرة فى الدقيقة
حركتها لناحية خارج الجسم
علشان تطرد اى حاجة تدخل الجسم من ناحية الجهاز التنفسى يعنى تخيل واحد بيدفعك بمعدل 350 الى 500 مرة فى الدقيقة لقدام اعتقد ان مفيش لا اتربة ولا ميكروب يقدر يدخل بالطريقة دى
الا لو
الاهداب دى حصلها مشكلة
واخطر مشكلة لها الامونيا او الريحة بتاعة الفرشة مع الرطوبة
الامونيا لو زادات عن 25 جزء فى المليون بتبدا تكسر الاهداب دى ولو حصل كسر بيدخل منة اما تراب دقيق او ميكروب
وطول ما الطير معرض للامونيا يتكسر جزء تانى ويدخل مرض تانى وهكذا
===== المخاط
دا ايضا فية كلام فنى وحقلى كتير
لكن مش هعرف اكتب كل حاجة
لكت اعرف انها موجودة فى الجزء العلوى من الجهاز التنفسى والامعاء بتعمل كمصيدة تمنع اى مسبب مرضى
====== الدموع
وايضا اللعاب
الاتنين مع بعض فيهم انزيمات هاضمة مجرد ما يتعرض لها اى ميكروب تحللة وتهضمة فورا
كل اللى فات دا اول حاجز من الثلاث حواجز اللى بتحمى الجسم
الحاجز التانى
بيسموة الحاجز الفيسيولوجى
دا يعتبر خط الدفاع التانى
يعنى اللى يعدى من الحاجز التشريحى صعب يعدى من الفيسيولوجى
الحاجز دا عبارة عن
4 حاجات
== اولهم حرارة الجسم
طول ما هى طبيعية (( 41.5 ) فية ميكروبات صعب تنشط فى الجسم الا اذا الحرارة اختلت
== درجة حموضة الامعاء او PH الامعاء
الجزئية دى فيها فنيات عالية جدا
نختصرها فى الاتى
حمووضة الامعاء فى اولها منخفضة وتبدا ترتفع شوية بشوية كل ما دخلنا داخل
الانخفاض دا صعب اى ميكروب ينمو فية لكن الميكروبات النافعة بتنمو
علشان كدا الناس بتعطى خمائر وبروبيوتيك محتوية على لاكتوباسيلس اللى بيفرز حمض الاكتيك اللى دايما محافظ على حموضة الامعاء ضد الميكروبات
واشهر مرضين مش بيحبو الحموضة دى الكولاى والسالمونيللا
== الثالثة
الانترفيرون
اعتقد الكل عارف المادة دى
هى اهم مادة قاتلة للفيروسات
بتيجى من الخلايا الاتهامية او الماكروفاج اللى اتكلمنا عنها فى البوست اللى فات
وبتفرز كمان من اى خلية اصابها فيرس
من اشهر المواد اللى بتدمر الفيرس
==== اخر حاجة
مركبات او عوامل متممة
ودى مواد ربنا حاططها فى الدم بصورة خاملة بمجرد ما تشوف انتجين مرضى تتحول الى صورة نشطة فتعمل ثقوب فى جدار البكتيريا او الفيرس فيموت فى الحال
== اخر حاجز
اسمة حاجز الالتهام
ودا بيكونة الخلايا الالتهامية اللى كنا اتكلمنا عنها
مع بعض الخلايا المناعية الاخرى علشان تتخلص من اى مسبب مرضى
وتنشط المناعة المكتسبة
اللى هتتكلم عنها بالتفصيل فى البوست القادم بامر المولى
بس خلى بالك
احنا نخرج من البوست دا ان اول خط دفاعى عن جسم الطير انت السبب فية
بالرعاية بتاعتك
سواء اتربة او امونيا او حرارة عالية او منخفضة غير مناسبة للطير
مش عاوز اعقد البوست ونكتفى بهذا القدر
ولو فية اقبال زى ما حصل مع البوست اللى فات هنشرح بطريقة مبسطة المناعة المكتسبة
واعتقد دى اللى تهم الناس كلها لانها بتاعة التحصينات اللى بتتحصن طول الدورة
اللهم اجعل عملنا هذا خالص لوجهك الكريم
مع تحياتى وشكرا
مهندس عاطف عبد الدايم